एजेन्सी । पाकिस्तान क्रिकेट टोलीलाई एकदिवसीय विश्वकप खेल्न भारत आउने भिसा प्राप्त भएको छ । टोली सेप्टेम्बर २७ मा भारत आउनेछ । उसले सेप्टेम्बर २९ मा न्युजिल्यान्डसँग वार्मअप खेल पनि खेल्नेछ ।
पाकिस्तानी टोली सोमबार बिहानै भारत आउने योजनामा थियो तर, भिसा मिलिरहेको थिएन । यसै कारण पाकिस्तान क्रिकेट बोर्ड (पीसीबी)ले अन्तर्राष्ट्रिय क्रिकेट काउन्सिल (आईसीसी)मा यसबारे गुनासो गरेको थियो । अब उजुरी परेको केही घण्टापछि टोलीको भिसा स्वीकृत भएको छ ।
ईएसपीएन क्रिकइन्फोका अनुसार पीसीबीले आईसीसीलाई पत्र लेखेर पाकिस्तानसँग यस्तो व्यवहार स्वीकार नगरिने बताएको थियो ।
यसअघि शुक्रबारसम्म भारतीय भिसा नपाएपछि पाकिस्तान क्रिकेट टोलीले दुबई हुँदै भारत आउने योजना रद्द गरेको थियो । अब पाकिस्तानी टोली सिधै हैदरावाद आउनेछ । क्रिकेट वेबसाइट क्रिकइन्फोले पाकिस्तान क्रिकेट टोली विश्वकपको अभ्यास खेलका लागि दुबई हुँदै हैदराबाद पुग्ने योजना बनाएको थियो । टोली केही दिन दुबईमा बस्ने योजनामा थियो । त्यसपछि हैदरावादमा हुने अभ्यास खेलका लागि उनीहरु भारत आउँदै थिए ।
एकदिवसीय विश्वकप अक्टोबर ५ बाट भारतमा सुरु हुँदैछ । पहिलो खेल अहमदाबादको नरेन्द्र मोदी स्टेडियममा इंग्ल्याण्ड र न्युजिल्याण्डबीच हुनेछ । पाकिस्तानले अक्टोबर ६ मा नेदरल्यान्ड्सविरुद्ध खेल्दै विश्वकपको सुरुवात गर्नेछ ।
