एजेन्सी । इन्डियन प्रिमियर लिग (आईपीएल) अन्तर्गत आज आइतबार लिग चरणका दुई खेलहरु हुँदैछन् । दिउँसो ३ः४५ बजे राजस्थान रोयल्स र रोयल च्यालेन्जर्स बैंगलोरले प्रतिस्पर्धा गर्दैछन् । यस्तै, साँझ ७ः४५ बजे चेन्नई सुपर किंग्स र कोलकाता नाइट राइडर्स भिड्दैछन् ।
राजस्थान र बैंगलोर जारी सिजनमा दोस्रोपटक भिड्न लागेका हुन् । यसअघि अप्रिल २३ मा बैंगलोरको एम चिन्नाश्वामी मैदानमा भएको खेलमा बैंगलोर ७ रनले विजयी भएको थियो ।
राजस्थान र बैंगलोरबीच जयपुरमा अहिलेसम्म ७ खेल भइसकेका छन् । जसमध्ये चार खेल राजस्थानले र तीन खेल बैंगलोरले जितेको छ । राजस्थानविरुद्ध बैंगलोरले यस मैदानमा विगत १० वर्षदेखि जित निकाल्न सकेको छैन । उसले अन्तिम पटक सन् २०१३ मा यस मैदानमा राजस्थानलाई हराएको थियो ।
राजस्थानले यो सिजन अहिलेसम्म १२ खेल खेलेको छ । जसमा ६ खेल जित्दा त्यति नै खेलमा हार बेहोरेको छ। टोलीको हाल १२ अंक छ । बैंगलोरविरुद्धको टोलीका ४ विदेशी खेलाडी जोस बटलर, जो रुट, शिमरोन हेटमायर र ट्रेन्ट बोल्ट हुन सक्छन् । यसबाहेक यशस्वी जैसवाल, युजवेन्द्र चहल र सञ्जु सामसनजस्ता खेलाडी उत्कृष्ट लयमा छन् ।
बैंगलोरले यो सिजन अहिलेसम्म खेलेका ११ खेलमध्ये ५ मा जित र ६ खेलमा हार बेहोरेको छ । टोलीको १० अंक छ । राजस्थान विरुद्धको टोलीका चार विदेशी खेलाडी फाफ डु प्लेसिस, ग्लेन म्याक्सवेल, वानिन्दु हसरंगा र जोस हेजलवुड हुन सक्छन् । यी बाहेक विराट कोहली, मोहम्मद सिराज र हर्षल पटेल जस्ता खेलाडीले टोलीलाई बलियो बनाएका छन् ।
हेड टु हेडको कुरा गर्ने हो भने राजस्थान र बैंगलोरबीच हालसम्म २९ वटा खेल भइसकेका छन् । जसमध्ये १४ खेल बैंगलोरले जितेको छ भने १२ खेल राजस्थानले जितेको छ । तीन खेल भने अनिर्णित रह्यो ।
सवाई मानसिंह स्टेडियमको पिच ब्याट्सम्यानहरुले निकै रुचाएका छन् । यहाँ बलरलाई अलि गाह्रो छ । आइतबार जयपुरको मौसम सफा हुने छ । द्रुत हावा चल्न सक्छ । दिउँसोको तापक्रम ३७ डिग्री सेल्सियसको आसपास रहनेछ ।
दुबै टिमका सम्भावित सुरुवाती–११
राजस्थान रोयल्सः सञ्जु सामसन (कप्तान र विकेटकिपर), यशस्वी जैसवाल, जोस बटलर, जो रुट, ध्रुव जुरेल, शिमरोन हेटमायर, रविचन्द्रन अश्विन, ट्रेन्ट बोल्ट, केएम आसिफ सन्दीप शर्मा र युजवेन्द्र चहल ।
रोयल च्यालेन्जर्स बैंगलोरः फाफ डु प्लेसिस (कप्तान), विराट कोहली, अनुज रावत, ग्लेन म्याक्सवेल, महिपाल लोमरर, दिनेश कार्तिक (विकेटकिपर), वानिन्दु हसरंगा, हर्षल पटेल, विजयकुमार वैशाख, मोहम्मद सिराज र जोश हेजलवुड ।
