एजेन्सी । च्याम्पियन्स लिग फुटबल अन्तर्गत रियल मड्रिडले रोमाञ्चक जित निकालेको छ । गएराति भएको समूह चरणको खेलमा स्पेनिस क्लब रियलले इटालीयन क्लब नापोलीलाई उसकै घरेलु मैदानमा ३–२ गोलले हराएको हो ।
खेलको १९ औं मिनेटमा लिओ स्क्रि ओस्टीगार्डले गोल गर्दै घरेलु टोली नापोलीलाई सुरुवाती अग्रता दिलाएका थिए ।
२७ औं मिनेटमा भिनिसियस जुनियरले गोल गर्दै रियललाई १–१ गोलको बराबरीमा ल्याए । ३४ औं मिनेटमा जुड बेलिङहमले गोल गर्दै रियललाई २–१ गोलले अगाडी बढाए । यता, ५४ औं मिनेटमा पिओटर जिलिन्स्कीले पेनाल्टीमा गोल गर्दै नापोलीलाई २–२ गोलको बराबरीमा ल्याए ।
तर, ७८ औं मिनेटमा डी–बक्स भन्दा बाहिरबाट रियलका भाल्भर्डेको सशक्त प्रहार पोस्टमा लागेर फर्किँदै नापोलीका गोलकिपर एलेक्स मेरेटलाई लागेर गोल हुन पुग्यो र रियल खेलमा विजयी भयो ।
यो नतिजासँगै समूह सी मा लगातार दोस्रो जित निकालेको रियल ६ अंक अंकका साथ तालिकाको शीर्ष स्थानमा रहेको छ । नापोली २ खेलबाटै ३ अंकका साथ दोस्रो स्थानमा छ ।
यसै समूहमा भएको अर्को खेलमा पोर्चुगीज क्लब एससी ब्रागाले जर्मन क्लब युनियन बर्लिनलाई उसकै मैदानमा ३–२ गोलले पराजित गर्यो । ब्रागा ३ अंकका साथ तेस्रो र अंकविहिन बर्लिन पुछारमा रहेको छ ।
