एजेन्सी । विश्व च्याम्पियन बन्ने सपना बोकेर भारत आएको पाकिस्तान नराम्ररी असफल मात्र भएन, बाहिरिने क्रममा आफ्नो इज्जत पनि बचाउन सकेन ।
कोलकातामा भएको लिग चरणको आफ्नो अन्तिम खेलमा चमत्कार गर्दै सेमिफाइनल पुग्ने आशा लिएर आएको पाकिस्तानले जित पनि पाउन सकेन ।
ब्याटिङ र बलिङमा उत्कृष्ट प्रदर्शन गर्दै इंग्ल्याण्डले पाकिस्तानलाई ९३ रनले पराजित गरेको हो । यो जितसँगै इंग्ल्याण्ड सन् २०२५ को च्याम्पियन्स ट्रफीका लागि छनोट भएको छ ।
इङ्ल्यान्डले ५० ओभरमा ९ विकेट गुमाएर ३३७ रनको लक्ष्य दिएको थियो । जवाफमा पाकिस्तान ४३.३ ओभरमा २४४ रन बनाएर अलआउट भयो ।
बेन स्टोक्सले ७६ बलमा ८४ रनको उत्कृष्ट इनिङ खेले भने जो रुट र जोनी बेयरस्टोले पनि अर्धशतकीय पारी खेले । बलिङमा आफ्नो अन्तिम अन्तर्राष्ट्रिय खेल खेलेका डेभिड विलीले सर्वाधिक ३ विकेट लिए ।
पाकिस्तान सेमिफाइनलको दौडबाट झण्डै आउट भइसकेको थियो । एउटै आशा थियो कि उसले इंग्ल्यान्ड विरुद्ध ठूलो अन्तरले जित्नुपर्ने थियो । यी आशाहरू पनि टसको समयमा चकनाचूर भए, जब इङ्गल्याण्डका कप्तान जोस बटलरले सिक्का टस जितेर पहिले ब्याटिङ गर्ने निर्णय गरे। यसपछि पाकिस्तानका लागि एउटा मात्र लक्ष्य बाँकी रह्यो–जितको सम्मानजनक विदाई। पाकिस्तानको उक्त सपना पनि चक्नाचुर भएको छ ।
