एजेन्सी । फ्रान्सेली फुटबल क्लब पेरिस सेन्ट जर्मेन (पिएसजी) का स्टार फरवार्ड लियोनल मेसीले क्लब छाड्ने पक्का भएको छ ।
३५ वर्षीय मेसीले यस सिजनको अन्त्यसँगै पिएसजी छाड्ने भएका हुन् ।
पिएसजीका मुख्य प्रशिक्षक क्रिस्टोफ गाल्टियरले मेसीले क्लब छाड्ने पुष्टि गरेका छन् । प्रशिक्षक गाल्टियरले मेसीले पिएसजीका लागि शनिबार क्लेर्मन्टसँग अन्तिम खेल खेल्ने जनाएका छन् ।
‘मैले फुटबलको इतिहासमा उत्कृष्ट खेलाडीलाई प्रशिक्षण दिने अवसर पाएको छु । पार्क डेस प्रिन्सेसमा यो उनको अन्तिम खेल हुनेछ र मलाई आशा छ कि उनले न्यानो स्वागत पाउनेछन् ।’ गाल्टियरले भनेका छन् ।
विश्वकप विजेता समेत रहेका मेसीको क्लबसँगको सम्झौता यसै समरमा सकिँदैछ । उनले २०२१ मा पिएसजीसँग दुई वर्षको सम्झौता गरेका थिए ।
मेसी पुनः आफ्नो पुरानो क्लब बार्सिलोना फर्कने चर्चा छ । मेसीले पिएसजीका लागि ७४ खेलमा ३२ गोल गरेका छन् ।
