एभर्टनविरुद्ध युनाइटेडको सहज जित

एजेन्सी । इंग्लिस प्रिमियर लिग फुटबल अन्तर्गत म्यान्चेस्टर युनाइटेडले सहज जित निकालेको छ ।

गएराति भएको खेलमा युनाइटेडले एभर्टनलाई उसकै मैदानमा ३–० गोलले पराजित गरेको हो । खेलको तेस्रो मिनेटमा नै अलेजान्ड्रो गर्नाचोले गोल गर्दै युनाइटेडलाई सुरुवाती अग्रता दिलाएका थिए ।

उनले बाइसाइकल किकमा सुन्दर गोल गरे । यस्तै, खेलको ५६ औं मिनेटमा माकुर्स रासफोर्डले पेनाल्टीमा गोल गर्दै युनाइटेडलाई २–० ले अघि बढाए । यस्तै, ७५ औं मिनेटमा एन्थोनी मार्सियलले गोल गर्दै युनाइटेडलाई ३–० को जित दिलाए ।

यो नतिजासँगै युनाइटेड १३ खेलबाट २४ अंकका साथ तालिकाको छैटौं स्थानमा उक्लिएको छ । एभर्टन भने ४ अंकका साथ १९ औं स्थानमा छ ।