ललितपुर सिटीका सहायक प्रशिक्षक सिलाकारलाई एनएसएलले लगायो प्रतिबन्ध

काठमाडौँ । नेपाल सुपर लिग (एनएसएल)को आयोजकले ललितपुर सिटी एफसीका सहायक प्रशिक्षक रविन्द्र सिलाकारमाथि प्रतिबन्ध लगाएको छ । आयोजकले एक विज्ञप्तीमार्फत उनीमाथि प्रतिबन्ध लगाएको जानकारी दिएको हो ।

गत मंगलबार भएको खेलमा सिलाकारले खेल सञ्चालन गरेका रेफ्री सुरोजित दासमाथि दुर्व्यवहार गरेको एनएसएलको ठहर छ । स्पोर्टिङ इलामसँगको खेलपछि रेफ्रीमाथि दुर्व्यवहार गरेको भन्दै अनुशासन समितिको सिफारिसमा सिलाकारलाई तत्काल लागु हुने गरी एनएसएलको यो सिजनमा कुनै पनि गतिविधिमा संलग्न हुन नपाउने गरी प्रतिबन्ध लगाएको एनएसएल आयोजक नेपाल स्पोर्टस् एण्ड इभेन्ट म्यानेजमेन्टले जनाएको छ । त्यस्तै, सिलाकारमाथि २० हजार रुपैयाँ जरिवाना पनि गरिएको छ । उनिमाथि गरिएको जरिवाना रकम क्लबले नभई व्यक्ति स्वयंले तिर्नुपर्नेछ ।

त्यस्तै, इलामका गोलकिपर विकेश कुथुमाथि व्यक्तिगत १० हजार रुपैयाँ जरिवाना गर्ने निर्णय पनि गरेको छ । कुथुले वीरगञ्ज युनाइटेडसँगको खेलमा रेफ्रीमाथि दुर्व्यवहार गरेका थिए ।