नेपाल सुपर लिगः फाइनल पुुग्नका लागि पोखरा र ललितपुर भिड्दै

काठमाडौँ । नेपाल सुपर लिग (एनएसएल) अन्तर्गत दोस्रो क्वालिफायरमा आज पोखरा थण्डर्स र ललितपुर सिटी एफसीबीच प्रतिस्पर्धा हुँदैछ ।

खेल त्रिपुरेश्वरस्थित दशरथ रंगशालमा साँझ साढे ५ बजे सुरु हुनेछ । पोखरा र ललितपुरबीचको खेलको विजेताले शनिबार हुने फाइनलमा धनगढी एफसीसँग प्रतिस्पर्धा गर्नेछ । धनगढीले पहिलो क्वालिफायरमा पोखरालाई टाईब्रेकरमा हराएर फाइनलमा स्थान पक्का गरेको थियो ।

पहिलो क्वालिफायरमा धनगढीसँग पराजित भए पनि पोखराले फाइनल प्रवेशका लागि अर्को अवसर पाएको हो । यस्तै, ललितपुरले एलिमिनेटरमा साविक विजेता काठमाडौं रेजर्सलाई ३–० को सहज जित निकाल्दै दोस्रो क्वालिफायरमा स्थान बनाएको थियो ।

लिग चरणमा पोखरा र ललितपुरले गोलरहित बराबरी खेलेका थिए । नकआउट खेल भएकोले दुवै टोलीका लागि आजको खेल निकै महत्वपूर्ण छ ।