लिगको अन्तिम खेलमा बार्सिलोनाको हार

एजेन्सी । स्पेनिस ला लिगा च्याम्पियन बार्सिलोनाले लिगको अन्तिम खेलमा हार बेहोरेको छ । गएराति भएको खेलमा बार्सिलोना सेल्टा भिगोसँग २–१ गोलले स्तब्ध बनेको हो ।

सेल्टालाई जित दिलाउन दुबै गोल गाब्री भिएगाले गरे । बार्सिलोनाका आन्सु फातीले एक गोल फर्काए । खेलको ४२ औं मिनेटमा भिएगाले गोल गर्दै घरेलु टोली सेल्टालाई सुरुवाती अग्रता दिलाएका थिए ।

६५ औं मिनेटमा भिएगाले व्यक्तिगत तथा टोलीका लागि दोस्रो गोल गर्दै अग्रता दोब्बर पारे । ७९ औं मिनेटमा फातीले गोल फर्काएपनि उनले बार्सिलोनाको हार टार्न सकेनन् । च्याम्पियन बार्सिलोनाले ३८ खेलबाट ८८ अंक जोड्दै लिग सकायो । यता, भालाडोलिड, इस्पान्योल र इल्चे रेलिगेशनमा परे ।