टाइगर कप पुरुषतर्फको उपाधि हेल्प नेपालले जित्यो

पोखरा । चौथो टाइगर कप (पुरुष)को उपाधि हेल्प नेपाल स्पोर्ट्स क्लबले जितेको छ । टाइगर ग्रुप अफ पोखराको आयोजनामा पोखरामा शनिबार भएको खेलमा हेल्प नेपालले घरेलु टोली गण्डकीलाई ३–१ को सेटमा पराजित गरेको हो ।

हेल्प नेपालले पहिलो र दोस्रो सेटमा क्रमशः २५–१३ र २५–१८ ले जित्यो । तेस्रो सेट गण्डकीले २५–२३ ले जितेर पुनरागमन आशा जीवित राखे पनि चौंथो सेट पुनः हेल्प नेपालले २५–१७ ले जित्यो ।

उपाधिसँगै हेल्प नेपालले ५ लाख ५५ हजार ५५५ रुपैयाँ हात पारेको छ । त्यस्तै, उपविजेता बनेको गण्डकी प्रदेशले २ लाख ५५ हजार ५५५ रुपैयाँ पाएको छ ।

शनिबार नै भएको महिलातर्फको फाइनल खेलमा विभागीय टिम एपीएफले जित्दै उपाधिमा ह्याट्रिक गरेको छ । एपीएफले न्यूडायमन्ड क्लबलाई सोझो सेटमा पराजित गर्दै लगातार तेस्रो पटक विजेता बनेको हो ।