आर्मीले पहिलोपटक जित्यो आहारारा पोखरा गोल्डकप

पोखरा । आहारारा पोखरा गोल्डकपको उपाधि विभागीय टिम त्रिभुवन आर्मी क्लबले जितेको छ ।

शनिबार पोखरा रंगशालामा भएको फाइनल खेलमा आर्मीले ३-० को गोलअन्तरले थ्रीस्टार क्लबलाई पराजित गर्दै उपाधी जितेको हो ।

आर्मीको जितमा खेलको ३८ औं मिनेटमा जिलेप्सीजंग कार्कीले पहिलो गोल गर्दै अग्रता दिलाए । खेलको ८३ औं मिनेटमा आर्मीका फत्तेमान घलेले दोस्रो गोल थप्दै अग्रता दोब्बर बनाए । त्यस्तै खेलको ९४ औं मिनेटमा वसन्त जिम्बाले अर्को गोल गर्दै टिमको जित सुनिश्चित पारे ।

योसंगै आर्मीले पहिलो पटक आहारारा उपाधि जित्दै इतिहास बनाएको छ । २०६० सालमा पहिलो पटक सहभागी भएको आर्मीले सेमिफाइनलसम्मको यात्रा तय गर्योए । त्यसपछि ४ पटकसम्म फाइनल यात्रा तय गरेर पनि आर्मी उपविजेतामा सीमित भएको थियो ।