मछिन्द्रले हिमालयन शेर्पालाई हरायो

काठमाडौँ। मछिन्द्र फुटबल क्लबले हिमालयन शेर्पा क्लबलाई पराजित गरेको छ। शहिद स्मारक ‘ए’ डिभिजन लिग फुटबल अन्तर्गत बुधबार त्रिपुरेश्वरस्थित दशरथ रंगशालामा भएको खेलमा मछिन्द्रले हिमालयन शेर्पा क्लबलाई ३–१ गोल अन्तरले पराजित गरेको हो।

मछिन्द्रको लागि खेलको २६ औं मिनेटमा विमल घर्ती मगरले गोल गर्दै मछिन्द्रलाई सुरुआती अग्रता दिलाएका थिए। त्यस्तै, आफिज ओलावालेले खेलको ६८ औं मिनेटमा तथा ७७ औं मिनेटमा गोल गरे।

हिमालयनका पिस्टोन मुटुम्बाले खेलको ९० औं मिनेटमा गोल गरेका हुन्।

जितसँगै मछिन्द्रले २५ खेलमा ४२ अंक जोडेर दोस्रो स्थानमा रहेको छ। हिमालयनले २५ खेलमा ३१ अंक जोडेको छ।