साफ महिला च्याम्पियनसिपमा माल्दिभ्सविरुद्ध भिड्दै नेपाल

काठमाडौँ । साफ वुमन्स च्याम्पियनसिप २०२४ मा नेपालले समूहको आफ्नो दोस्रो खेलमा आज माल्दिभ्सँग खेल्दै छ । खेल त्रिपुरेश्वरस्थित दशरथ रंगशालमा साँझ ५ः३० मा खेल सुरु हुनेछ।

यसअघि समूह बी को पहिलो खेलमा नेपालले भुटानसँग गोलरहित बराबरीमा रोकिएको थियो । आजको खेलमा नेपालसँग स्टार स्ट्राइकर सावित्रा भण्डारी पनि भएकाले स्वभाविक रुपमा बलियो मनोबलका साथ मैदान उत्रिने छ । फ्रान्समा लिग खेलिरहेकी मुख्य फरवार्ड सावित्रा आइतबार राति स्वदेश फर्किएकी हुन् । यसअघि भुटान विरुद्धको खेलमा उनको अभाव स्पष्ट देखिएको थियो ।

सावित्राले नेपालक लागि ४६ खेलमा सर्वाधिक ५३ गोल गरेकी छन् ।

समूह बी मा नेपालको १ अंक छ भने माल्दिभ्स अंकविहीन छ । माल्दिभ्स पहिलो खेलमा श्रीलंकासँग १–० ले पराजित भएको थियो । आजै श्रीलंका र भुटानबीच दिउँसो १ः३० मा पहिलो खेल हुनेछ । भुटानले श्रीलंकालाई हराएमा सेमिफाइनल पुग्नेछ ।