महिला टी–२० मा नेपालले हरायो हङकङलाई

काठमाडौं । युगान्डामा जारी वुमन्स डे महिला टी–२० अन्तर्राष्ट्रिय क्रिकेट प्रतियोगिता अन्तर्गत आज भएको खेलमा नेपालले हङकङलाई ६ विकेटले पराजित गरेको छ ।

‘टस’ जितेर पहिला ‘ब्याटिङ’ गरेको हङकङले नेपाल सामु १०५ रनको लक्ष्य प्रस्तुत गरेको थियो । हङकङले प्रस्तुत गरेको १०५ रनको लक्ष्य नेपालले ४ विकेटको क्षतिमा १९.३ ओभरमा पूरा गर्‍यो

युगान्डाको इन्टेबे क्रिकेट मैदानमा भएको खेलमा हङकङले निर्धारित २० ओभरमा आठ विकेट गुमाएर १०४ रन बनाएको थियो । हङकङका लागि शान्जिन शहजदले सर्वाधिक ५४ रन बनाइन् । उनले ४७ बलमा पाँच चौका र एक छक्का प्रहार गरिन् ।

त्यसैगरी, करी चानले १६ तथा यास्मिन दासवानीले १४ रन जोडिन् । बलिङतर्फ नेपालकी राजमती ऐरीले तीन, कप्तान इन्दु बर्माले दुई तथा पूजा महतो र ईश्वरी विष्टले एक एक विकेट लिइन् ।