कोरोना भाइरसको कारण चीनमा २६ जनाको मृत्यु, संक्रमण फैलन नदिन कडाई

• शुक्रबार, १० माघ, २०७६
• 3 weeks ago
• अन्तर्राष्ट्रिय

 

 

 

एजेन्सी । कोरोना भाइरसको कारण चीनमा २६ जनाको मृत्यु भएको छ भने सयौं जनामा उक्त भाइरसको संक्रमण देखिएको चिनियाँ अधिकारीहरुले बताएका छन् । 

 

शुक्रबार बिहानसम्मको रिपोर्टले उक्त संख्यामा मानिसहरुले ज्यान गुमाएको स्वास्थ्य अधिकारीहरुले जानकारी दिएका छन् । 

 

कोरोना भाइरस संक्रमणको सबैभन्दा बढी प्रभावित मानिएको क्षेत्र चीनको हुबेई हो । हुबेई प्रान्तको वुहान सहरमा यसको बढी प्रभाव देखिएको र त्यहीँबाट नै यसको उत्पत्ति भएकोले पशुबजारमा पनि कडा नियमन गरिएको छ । 

 

चीनका विभिन्न २५ प्रान्तमा यो भाइरसको संक्रमण फैलिएको छ । स्थानीय प्रशासनले जङ्गली जनावर र पशु बजारका क्षेत्रमा कडाई गर्न निर्देशन दिइएको बताएको छ । 

 

यसका साथै मानिसहरुको बढी आवतजावत हुने विमानस्थल, बसपार्क र रेलमार्ग स्टेसनमा पनि स्वास्थ्य जाँचको प्रबन्ध मिलाइएको अधिकारीहरुले जानकारी दिएका छन् । हुबेई प्रान्तमा नै यसबाट धेरैको ज्यान गएको छ । 

 

मृत्यु हुनेमध्ये धेरै ४८ देखि ८९ वर्ष उमेरका व्यक्ति रहेको पनि जनाइएको छ । यो संक्रमणको संख्यामा करिब ६ हजार जनालाई उपचारार्थ भर्ना गरिएको छ । यसबाट निको भएर करिब एक हजार जना व्यक्ति अस्पतालबाट घर पनि फर्किएका छन् । तर उनीहरुलाई पनि विशेष निगरानीमा राखिएको बताइएको छ । 

 

चीनको वुहानको जनसंख्या भन्डै एक करोड रहेको छ । त्यसैले उक्त संक्रमणको उत्पत्ति भएको सो क्षेत्रमा सरकारले बढी निगरानी राखिरहेको पनि बताइएको छ । 

 

त्यसैगरी जापानको राजधानी टोकियोमा पनि एक जना व्यक्तिमा कोरोना भाइरसको संक्रमण देखिएको अधिकारीहरुले जनाएका छन् । 

दक्षिण कोरिया, ताइवान, हङकङ, मकाउ र थाइल्याण्डमा पनि यस संक्रमणका एक–एक जना भेटिएका छन ।

• कोरोना भाइरस