नयाँ नेतृत्व चुन्दै नेप्लिज सेफ एशोसिएसन यूके

• बुधबार, २० चैत, २०७५
• 10 months ago
• युके

 

 

 

 

लण्डन । बेलायतमा कार्यरत नेपाली सेफहरुको संस्था 'नेप्लिज सेफ एशोसिएसन यूके' यतिबेला आफ्नो नयाँ नेतृत्व चयनको तयारीमा जुटेको छ । 

 

आउँदो सोमबार ८ अप्रिलमा लण्डनको ईष्टकोटस्थित भेन्यू फाइभ रेष्टुरेन्टमा तय दोस्रो अधिवेसनले संस्थालाई नयाँ नेतृत्व दिलाउँदैछ । साँझ ६ बजेदेखि सुरु हुने अधिवेसनमा संस्थाका विगतका गतिविधिहरुको समिक्षाका साथै भावी कार्यदिशा तय समेत गरिनेछ । 

 

एशोसिएसनका अध्यक्ष कृष्ण तिमल्सेनाले संस्थाको भावी नेतृत्व सर्वसम्मतिमै चुन्ने प्रयास भइरहेको जानकारी दिएका छन् । नयाँ नेतृत्व चयनको लागि एनआरएन अभियन्ता रामशरण सिम्खडाको  संयोजकत्वमा व्यवसायी बिजन भट्ट र पत्रकार फडिन्द्र भट्टराई सदस्य रहेको निर्वाचन समिति गठन गरिएको छ । 

 

यकिन तथ्यांक नरहेपनि अहिले बेलायतमा कार्यरत नेपाली सेफहरुको संख्या ३ हजारदेखि ३५ सयको हाराहारीमा रहेको अनुमान एशोसिएसन अध्यक्ष तिमल्सेनाको छ । यीनै नेपाली सेफहरुलाई एकबद्ध गर्दै उनीहरुको प्रोफेसनल र व्यवसायिक विकासमा समेत सहयोग गर्ने उद्धेश्यले सन् २०१२ मा एशोसिएसन स्थापना भएको थियो । 

 

एशोसिएसनमा अहिले लण्डनबाहेक आसपास र लिभरपुल, मिडल्याण्ड, स्कटल्याण्ड, वेल्स लगायतबाट समेत गरी करिब ५ सय नेपाली सेफहरु आबद्ध भइसकेका छन् । 

 

 

बेलायतका एक अग्रणी सामाजिक अभियन्ता समेत रहेका तिमल्सेनाको नेतृत्वमा गठित तदर्थ समितिले त्यसको केहि समयपछि पहिलो अधिवेसन सम्पन्न गरेको थियो । उक्त अधिवेसनले पनि संस्थाको नेतृत्व तिमल्सेनालाई नै सुम्पिएको थियो । 

 

एशोसिएसनको अवधारणा बनाउनेदेखि तदर्थ समिति र पहिलो कार्यसमिति समेतको नेतृत्व सम्हालेका तिमल्सेनालाई आउने नेतृत्वले संस्थालाई अझ बढि व्यापक र सशक्त बनाउने विश्वास छ । 

 

'नेपालबाट बेलायत आएर सेटल हुनेमा गोर्खाहरुबाहेक सेफहरु नै पहिलो रहेको देखिन्छ । सन् १९६० को दशकमै नेपाली सेफहरु बेलायत आएको इतिहास छ', तिमल्सेना भन्छन्, 'यति ठूलो इतिहास र यति धेरै सदस्यहरु रहेको यो संस्थाको भविष्यमा अझ ठूलो सम्भावना मैले देखेको छु ।' 

 

आसन्न दोस्रो अधिवेसनमा सहभागिताको लागि अध्यक्ष तिमल्सेनाले बेलायतमा कार्यरत सम्पुर्ण नेपाली सेफहरुलाई अपील गरेका छन् ।