वीकेण्ड मनाउँदा ध्यान दिनुपर्ने कुराहरू

• नेपालीपत्र
• शुक्रबार, २७ मंसिर, २०७६
• 1 month ago
• जीवनशैली/स्वास्थ्य

 

 

 

काठमाडौँ । उपभोक्तावादी संस्कृतिको विस्तारसँगै वीकेण्ड (सप्ताहन्त) मनाउने चलन व्यापक हुँदै गइरहेको छ । शहरमा सप्ताहन्त मनाउने प्रचलन बढेसँगै व्यापारीहरूले आफ्नो उत्पादन बजारमा पठाउने औपचारिक कार्यक्रमहरू समेत वीकेण्ड लक्षित गर्न थालेका छन् ।

 

सिनेमाघरहरूमा फिल्म रिलिज शुक्रबारको दिन गर्ने प्रचलन संस्कृतिजस्तै भइसकेको छ । बजारमा अधिकांश नयाँ उत्पादनहरू समेत शुक्रबार नै लन्च गरिन्छ । त्यसैले मानिसहरूको लागि वीकेण्ड अहिले प्रत्येक साता आउने चाडपर्व जस्तो हुन थालेको छ ।

 

विशेषगरी कामकाजी मानिसहरू वीकेण्डलाई लिएर उत्साहित हुने गर्छन् । साताभरी कार्यालयमा काम गर्दा हुने हैरानीबाट मुक्त हुने दिनको रुपमा उनीहरू वीकेण्ड मनाउने गर्छन् ।

 

वीकेण्डको भोलिपल्ट कार्यालय बिदा हुने कारणले गर्दा मानिसहरू वीकेण्डमा खुबै रमाइलो गर्न चाहन्छन् । तर यसरी वीकेण्ड मनाउँदै गर्दा मानिसहरूले केही कुरामा भने अवश्य ध्यान दिनुपर्दछ ।

 

– वीकेण्डमा प्रायःजसो मानिसहरू अत्याधिक मदिरा सेवन गर्ने गर्छन् । मदिरा सेवन आफैमा स्वास्थ्यको लागि हानीकारक चिज हो । यद्यपि अत्याधिक मदिरा सेवनले मानिसहरू अचेत अवस्थामा पुग्नु राम्रो कुरा होइन ।

 

– रमाइलो र मस्तिका लागि मानिसहरू वीकेण्डमा दिल खोलेर खर्च गर्ने गर्छन् । कतिपय मानिसहरूले खर्च गर्ने क्रममा आफ्नो पकेटको अवस्थालाई समेत ध्यान दिँदैनन् र सरसापटी गरेरै भए पनि वीकेण्ड मनाउँछन् । आर्थिक अनुशासनको दृष्टिले यो अत्यन्तै नराम्रो कुरा हो ।

 

– वीकेण्डमा प्रायः मानिसहरू आफ्ना साथीभाईहरूसँग मात्रै रमाइलो गर्ने गर्छन् । सप्ताहन्तमा उनीहरू कतिबेला घर पुग्ने भन्ने टुंगो हुँदैन । यस्तो हुँदा पारिवारिक मनमुटाव बढ्न सक्नेतर्फ मानिसहरूले ध्यान दिएको पाइदैँन ।

 

– वीकेण्डमा अधिकांश मानिसहरू मदिरा सेवन गरेर सवारी हाँक्ने गर्छन् । यसलाई ध्यानमा राखेर ट्राफिक प्रहरीले वीकेण्डमा चेकिङ कडा पारेको त हुन्छ । तर मानिसहरूले त्यसलाई समेत ध्यान नदिँदा सवारी दुर्घटनाको दर बढ्ने गर्दछ । एक अनुसन्धानले विश्वभरी नै प्रायः सप्ताहन्तकै दिन शहरमा बढी सवारी दुर्घटनाहरू हुने गरेको देखाएको छ ।

• वीकेण्ड