काठमाडौं । एन्फा यू–१६ युथ लिगको निरन्तरतामा शंका पैदा भएको छ । एन्फा र क्लबको पछिल्लो विवादले युथ लिग अन्यौलमा परेको हो ।
फिफाको आर्थिक सहयोग र एन्फाको आयोजनामा उमेर समूहका खेलाडीलाई एक्सपोजर दिने उद्धेश्यले यू–१६ लिगको सुरुआत गरिएको थियो । तर दोस्रो चरणका खेल सम्पन्न नहुँदै ए डिभिजनका चार क्लबले लिग बहिष्कार गरेका छन् ।
एन्फाले बढी उमेरका खेलाडी खेलाएको भन्दै एनआरटीमाथि कारबाही गरेको थियो । एनआरटीको तीन अंक घटाउने र एमआरआई गर्दाको शुल्क र थप १० हजार जरिवाना गर्ने निर्णय एन्फाले गरेको थियो । उक्त निर्णयविरुद्ध क्लबहरुले एन्फामा अपिल गरेका थिए । माग सम्बोधनमा एन्फा नेतृत्व जिम्मेवार नभएको भन्दै चार क्लबले लिग बहिष्कार गर्ने निर्णय गरेका हुन् ।
ए डिभिजनका एनआरटी, संकटा, फ्रेन्ड्स र मनाङले युथ लिग बहिष्कार गर्ने भएका हुन् । लिग सञ्चालनमा एन्फाले आफ्ना माग सम्बोधन नगरेको क्लबहरुको गुनासो छ ।
शुक्रबार क्लबहरुले गरेको सहमति अनुसार शनिबार च्यासल मैदानमा मनाङ र मछिन्द्र खेल्ने तालिका रहेको थियो । तर मनाङ उपस्थित भएन ।
