एजेन्सी । साउदी अरेबियाका क्लबहरुले महँगो मुल्यमा स्टार खेलाडीहरु अनुबन्ध गरेसँगै प्रिमियर लिग लगायत अन्य चर्चित लिगहरुलाई समस्या परेको छ । मिडिया रिपोर्टका अनुसार साउदी अरेबियन प्रो लिग क्लबहरुले खेलाडीहरुलाई दिएको अफर खेलाडीहरुले अस्वीकार गर्नैनसक्ने खालको भएको हुँदा स्टार खेलाडीहरु क्लबमा टिकाराख्न समस्या भएको देखिएको छ ।
स्टार खेलाडी क्रिस्टियानो रोनाल्डो गएको सिजन अल–नासर क्लबमा अनुबन्ध भएका थिए । त्यसयता साउदी प्रो लिग खेल्न स्टार खेलाडीहरु साडियो माने, करिम बेन्जेमा, रोबर्टो फिरिमिन्हो, म्याक्सीम्यान, हेण्डरसन, फाबिन्हो, रियाद महरेज लगायत अन्य खेलाडीहरु विभिन्न क्लबमा अनुबन्ध भएका छन् ।
उनीहरुले पाउने तलब पनि प्रिमियर लिगकोभन्दा धेरै गुणा बढी रहेको छ । उता म्यानचेस्टर सिटीका प्रशिक्षक पेप ग्वार्डीवालाले साउदीका कारण स्टार खेलाडी क्लबमा टिकाइराख्न र उनीहरुले अफर गरेको पैसा दिन युरोपियन क्लबहरु सक्षम नरहेको बताएका छन् ।
उनले भनेका छन्,‘यो क्रम कहिलेसम्म रहन्छ थाहा छैन । तर, खेलाडीहरुले साउदीबाट यस्तै अफर पाइरहे भने युरोपियन क्लबहरुले ठुलै समस्या देख्नुपर्नेछ ।’
रियाद महरेजलाई क्लबले रोकिराख्न नसकेको गुनासो समेत उनले पोखे । ‘साउदी क्लबले दिएको अफर अस्वीकार गर भन्ने सुझाव मैले महरेज दिन सकिन’, उनले भने । युरोपियन लिगलाई साउदी लिगले ठुलो चुनौती दिएको उनले बताए ।
