रियलको सहज जित

एजेन्सी । स्पेनिस फुटबल लिग ला लिगा अन्तर्गत रियल मड्रिडले जित निकालेको छ । गएराति भएको खेलमा रियलले अल्मेरियालाई उसकै मैदानमा ३–१ गोलले पराजित गरेको हो ।

रियललाई जित दिलाउन जुड बेलिङहमले दुई गोल गरे भने भिनिसियस जुनियरले एक गोल थपे । खेलको तेस्रो मिनेटमा नै सर्जियो एरिवासले गोल गर्दै घरेलु टोली अल्मेरियालाई सुरुवाती अग्रता दिलाएका थिए ।

यता, १९ औं मिनेटमा बेलिङहमले गोल गर्दै रियललाई १–१ गोलको बराबरीमा ल्याए । त्यसपछि ६० औं मिनेटमा उनले गोल गर्दै रियललाई २–१ ले अघि बढाए । ७३ औं मिनेटमा भिनिसियसले गोल थप्दै रियललाई ३–१ गोलको जित दिलाए ।

योसँगै २ खेलमा २ जितसहित ६ अंक जोडेको रियल तालिकाको शीर्षस्थानमा रहेको छ । दुबै खेलमा पराजित अल्मेरिया अंकविहिन रहँदै पुछारमा छ ।