राष्ट्रपति पौडेलद्वारा जानकी मन्दिरको पूजा अर्चना

जनकपुर। राष्ट्रपति रामचन्द्र पौडेलले जनकपुरधामस्थित जानकी मन्दिरमा पूजा अर्चना गरेका छन्।

सोमबार बिहान नेपाली सेनाको हेलिकप्टरबाट जनकपुरधाम पुगेका राष्ट्रपति पौडेललाई जानकी मन्दिरका महन्थ रामतपेश्वर दास र उत्तराधिकारी महन्थ रोशन दासले पूजा अर्चना गराएका हुन्।

राष्ट्रपतिमा निर्वाचित भएपछि पौडेल पहिलो पटक जनकपुरधाम पुगेका हुन्। उनले सीताराम संकिर्तन तथा १ सय ८ शालिग्रामको समेत अवलोकन गरे। राष्ट्रपति पौडेलले महेन्द्रनारायण निधि मिथिला संस्कृति अध्ययन केन्द्रको भवनको उद्घाटन गर्ने कार्यक्रम रहेको छ।

साथै जनकपुरधाम उपमहानगरपालिकाले राष्ट्रपति पौडेललाई नागरिक अभिनन्दन गर्ने कार्यक्रम पनि रहेको छ।