इजरायलमा ज्यान गुमाएका नेपालीको शोकमा मंगलबार राष्ट्रिय शोक, मृतकका परिवारलाई १० लाख राहत

काठमाडौँ। इजरायलमा भएको आक्रमणमा १० जना नेपालीले ज्यान गुमाएको शोकमा सरकारले भोलि मंगलबार राष्ट्रिय शोकको घोषणा गरेको छ।

आज सोमवार बसेको मन्त्रिपरिषद् बैठकले भोलि मंगलवार राष्ट्रिय शोकको घोषणा गरेको सरकारकी प्रवक्ता एवम् सूचना तथा सञ्चार प्रविधि मन्त्री रेखा शर्माले जानकारी दिइन्।

यस्तै बैठकले मृतकका परिवारलाई १०–१० लाख रुपैयाँका दरले राहत उपलब्ध गराउने र इजरायलमा रहेका तथा स्वदेश आउन चाहने सबै नेपालीलाई ल्याउने पनि निर्णय गरेको उनले जानकारी दिइन्।

सुदूरपश्चिम विश्वविद्यालयबाट अध्ययनका लागि इजरायल पुगेका विद्यार्थीमध्ये १० जनाको निधन भएको आइतबार पुष्टि भएको थियो। ४९ विद्यार्थीमध्ये ४ जना घाइते रहेको र एक जना सम्पर्कविहीन रहेको दूतावासले जनाएको छ। बाँकी सम्पर्कमा रहेको दूतावासले जनाएको छ।