काठमाडौँ। ललितपुरस्थित किष्ट शिक्षण अस्पतालले एक जना बिरामीको दुई महत्त्वपूर्ण अङ्गको एकै पटकमा प्रत्यारोपण शल्यक्रिया गरेको छ।
सोमबार अस्पतालले एक जना बिरामीको कलेजो र मिर्गौलाको प्रत्यारोपण शल्यक्रिया सम्पन्न गरेको अस्पतालका प्रा.डा. सुरज बज्राचार्यले जानकारी दिए।
चितवन भरतपुरकी ३४ वर्षीया महिलाको कलेजो र मिर्गौलाको प्रत्यारोपण गरिएको हो। ३४ वर्षीय श्रीमानले उनलाई कलेजो दान दिएका थिए भने उनकी ३२ वर्षीया भाउजूले मिर्गौला दान गरेकी हुन्।
बिरामी महिलामा जन्मजात रोग देखिएको थियो। कलेजोका कारणले दुबै मिर्गौला बिग्रिएको थियो। मिर्गौला बिग्रिएर उनले अस्पतालबाट डायलाइसिस सेवा लिइरहेकी थिइन्। कलेजोबाट निस्किएको रसायनका कारण मिर्गौला खराब भएको बज्राचार्यले बताए।
त्यसैले एकैसाथ दुबै अङ्गको प्रत्यारोपण गर्नुपरेको अस्पतालले जनाएको छ। प्रा।डा। बज्राचार्यका अनुसार यो नेपालको इतिहासमै पहिलो पटक गरिएको हो।
शल्यक्रिया गर्न १८ घण्टाभन्दा बढी समय लागेको र शल्यक्रिया गर्न १०० जना भन्दा बढी जनशक्ति परिचालन भएको बज्राचार्यले बताए।
वरिष्ठ ट्रान्सप्लान्ट सर्जन, ट्रान्सप्लान्ट फिजिसियन, एनेस्थेसियोलोजिस्ट, आइसियु क्रिटिकल केयर विशेषज्ञ, ब्लडबैंक विशेषज्ञ, इन्टरभेन्सनल रेडियोलोजिस्ट, स्पेसियलिस्ट फिजिसियन, सर्जन तथा नर्सिङका दक्ष प्राविधिकहरू परिचालन भएका थिए।
किष्ट शिक्षण अस्पतालमा ११५ जना भन्दा धेरैको अङ्ग प्रत्यारोपण शल्यक्रिया गरिसकेको छ।
