काठमाडौँ। एसीसी १९ वर्ष मुनिको एसिया कप क्रिकेटको पहिलो खेलमा नेपाल पाकिस्तानसँग ७ विकेटले पराजित भएको छ।
नेपालले दिएको एक सय ५३ रनको लक्ष्य पाकिस्तानले २६ ओभर २ बलमा ३ विकेट गुमाएर भेट्टाएको हो। पाकिस्तानका आजन आविस ५६ रनमा अविजित रहे। कप्तान साद बेग ५० रनमा आउट भए। मोहम्मद जिशान २० रनमा अविजित रहे। नेपालका गुलशन झाले २ र आकाश त्रिपाठीले एक विकेट लिए।
त्यसअघि यूएईमा टस हारेर पहिला ब्याटिङ गरेको नेपाल ४७ ओभर २ बलमा एक सय ५२ रन बनाउँदा अलआउट भयो । नेपालका विकेटकिपर उत्तम थापा मगरले अर्धशतक बनाए। उनी ७६ बलमा ५१ रन बनाएर आउट भए।
त्यस्तै दिपेश कंडेल ३१ र अर्जुन कुमाल २१ रनमा आउट भए। सुवास भण्डारी ८ रनमा अविजित रहे। विपिन रावल ७ रनमा, आकाश त्रिपाठी ६ रनमा, आकाश चन्द ५ रनमा, गुलशन झा र विशाल विक्रम केसी समान एक रनमा तथा कप्तान देव खनाल १३ बलमा शून्य रनमा आउट भए।
पाकिस्तानका तीव्र गतिका बलर मोहम्मद जिशानले ६ विकेट लिए। अमिर हसनले दुई विकेट लिए। प्रतियोगितामा नेपालसहित ८ देश सहभागी छन्। नेपाल रहेको समूह ‘ए’ मा भारत, पाकिस्तान र अफगानिस्तान छन्। त्यस्तै समूह ‘बी’ मा घरेलु टोली यूएई, जापान, श्रीलंका र बंगलादेश छन्।
नेपालले दोस्रो खेल पर्सी आइतवार अफगानिस्तानसँग र तेस्रो खेल २६ गते भारतसँग खेल्नेछ। मंसिर २९ गते सेमिफाइनल खेल हुनेछ। प्रतियोगिताको फाइनल खेल आउँदो पुस १ गते हुनेछ।
