काठमाडौँ। प्रधानमन्त्री पुष्पकमल दाहाल प्रचण्डले काठमाडौँ महानगरपालिकाका मेयर बालेन्द्र शाहप्रति असन्तुष्टि व्यक्त गरेका छन्।
सोमबार ललितपुर महानगरपालिकाको १०५ औं स्थापना दिवसमा सहभागी भएका काठमाडौँका मेयर बालेनले फोहोर व्यवस्थापन, काठमाडौँको खोला अतिक्रमणलगायको विषयमा संघीय सरकारबाट अपेक्षित सहयोग नपाएको गुनासो गरे। उनले प्रधानमन्त्री तथा गृहमन्त्रीले चाहेको खण्डमा यो समस्य तुरुन्तै समाधान हुने कुरा राखेपछि उनी कार्यक्रमबाट हिँडेका थिए।
आफू बोल्नुअघि मेयर बालेनले आफ्ना कुरा राखेर हिँडेपछि प्रधानमन्त्री प्रचण्ड असन्तुष्ट देखिए। यस्तो कुराले आफूले ‘इरिटेशन’ हुने बताए।
‘अघि बालेन्द्रजी गइहाल्नुभयो, मलाई फेरि पहिला बोलेर हिँड्नेसँग पनि अलिअलि इरिटेसन हुन्छ,’ प्रधानमन्त्री प्रचण्डले भने, ‘आफूले भन्ने कुरा जे–जे भनिहाल्ने अनि त्यसको जवाफ सुन्नका लागि बस्दै नबस्ने गर्न हुँदैन, प्रमुख अतिथिले बोल्ने बेलासम्म बस्नुपर्छ।’
त्यस्तै, प्रधानमन्त्रीले फोहोर ब्यवस्थापन, खोला अतिक्रमण लगायतको लागि आफूले जति अन्य प्रधानमन्त्रीले प्रयास नगरेको समेत बताए।
