काठमाडौँ । गैरआवासीय नेपाली संघ (एनआरएनए)ले नेपाल क्रिकेट संघ (क्यान)लाई १० लाख रुपैँया सहयोग गरेको छ ।
टी–२० विश्वकपमा सहभागी नेपाली क्रिकेट खेलाडीहरुको सहयोगको लागि नेपाल क्रिकेट एसोसिएसन (क्यान) मार्फत् हौसलास्वरूप १० लाख रुपैयाँ प्रदान गरेको हो ।
एनआरएनए अध्यक्ष बद्री केसीले नेपाललाई चिनाउने क्यानसँग सहकार्य गर्न पाउँदा उत्साहित भएको बताउँदै नेपालमा खेलाडी बन्ने रहर भएतापनि व्यवस्थापन गर्नुपर्ने विडम्बना भएकाले एनआरएनएले केही मात्रमा क्रिकेटमा सहयोग गरेको बताए ।
कार्यक्रममा एनआरएनए युवा उपाध्यक्ष एवं खेलकुद प्रतिष्ठानका रोशनकुमार थापाले नेपाली मात्रै एकजुट भइ सस्टिनेबल पूर्वाधार बनाउन योजना बनाएमा एनआरएनएले हाम्रो हरेक खालको सहयोग गर्न तयार रहेको बताए ।
एनआरएन सचिव पारसमणी पोखरेलले ५० हजार नेपाली नागरिक बस्ने टेक्सासमा आगामि जुन ४ मा हुने नेपाल र नेदरल्याण्डको खेलमा अहिलेसम्मकै बढी नेपाली दर्शकको बलियो उपस्थित गराउने बताए ।
अर्का सचिव स्वतन्त्रप्रताप शाहले राष्ट्रिय टिमले विदेशमा बस्ने नेपालीलाई गर्व गर्ने वातावरण बनाएको भन्दै आगामी खेलेमा टिमलाई एनआरएनएको निरन्तर साथ हुने बताए ।
एनआरएनए आइसीसी सदस्य हेमन्त काफ्लेले खेलाडीले मुलुक चिनाउने काम गर्ने हुँदा मुलुक चिनाउने अभियानमा एनआरएनएले क्यानसंग हातेमालो गर्न पाउनु गौरवको कुरा रहेको बताए ।
कार्यक्रममा बोल्दै क्यानका सचिव एवं पूर्वकप्तान पारस खड्काले नेपाल विश्वकपमा छनोट भइसकेपछि धेरैले क्यानसँग जोडिन खोजेको भन्दै नेपाली क्रिकेटमा गैरआवासीय नेपालीको साथको आवश्यकता निरन्तर रहेको बताए ।
बिना लगानी वा थोरै लगानीमा यो स्थितिसम्म आइपुगेको भन्दै उनले क्रिकेटको संरचना पनि विकास हुन थालेको बताउनु हुँदै खड्काले राष्ट्रिय क्रिकेटमात्र होइन जिल्ला र स्थानीय संरचनालाई पनि सहयोग गर्नुपर्ने बताए ।
पूर्वकप्तान विनोद दासले क्रिकेटका उल्लेख्य फ्यान रहेकोमा पूर्वाधारमा नै ध्यान दिन नसक्नु कमजोरी भइरहेको बताए ।
क्यानका कार्यकारी सदस्य सुदीप शर्माले एनआरएनले गरेको सुरुवात स्वागतयोग्य रहेको र भोलिका दिनमा पूर्वाधार विकास र खेलाडीलाई अघि बढ्न मद्दत पुग्ने बताए ।कार्यक्रममा क्यानका सचिव पारस खड्का, व्यवस्थापक एवं पूर्वकप्तान विनोद दास, कार्यकारी सदस्य सुदिप शर्मालगायत उपस्थित पदाधिकारीलाई एनआएरएनले सम्मान गरेको थियो ।
