काठमाडौँ । प्रधानमन्त्री पुष्पकमल दाहाल प्रचण्डले आज संसद्बाट विश्वासको मत लिँदै छन् ।
नेपाली कांग्रेससँगको गठबन्धन भत्काएर नयाँ बनाएपछि उनले तेस्रोपटक विश्वासको मत लिन लागेका हुन् । अहिले प्रधानमन्त्रीलाई नेकपा एमाले, नेकपा माओवादी केन्द्र, रास्वपा, जसपा र नेकपा एकीकृत समाजवादीको समर्थन छ ।
प्रतिनिधि सभामा अहिले कायम २७४ सदस्यीयमा बहुमत सिद्ध गर्न १३८ सदस्य आवश्यक पर्छ । पाँच दलीय गठबन्धनसँग प्रतिनिधिसभामा १५३ सदस्य छन् । एमालेका ७८, माओवादीका ३२, रास्वपाका २१, जसपाका १२ र एकीकृत समाजवादीका १० सांसद छन् ।
एमालेका टोपबहादुर रायमाझी निलम्बनमा परेको र देवराज घिमिरेले सभाको नेतृत्वकर्ताको हिसाबले मतदानमा सहभागी हुन मिल्दैन। गठबन्धनका पाँचै दलले विश्वासको मत लिन आफ्ना सांसदहरुलाई ह्विप जारी गरेका छन् ।
प्रधानमन्त्रीलाई विश्वासको मत दिनेबारे नागरिक उन्मुक्ति पार्टीभित्र भने विवाद छ । संसदीय दलका नेता रञ्जिता श्रेष्ठले मंगलवार चारैजना सांसदलाई अनिवार्य उपस्थित भएर विश्वासको मतको पक्षमा उभिन ह्विप लगाएकी छिन् ।
लोसपाले समर्थन गर्ने कि नगर्ने भन्नेबारे निर्णय गरिसकेको छैन । नेपाली कांग्रेसले विपक्षमा मत दिन सांसदलाई ह्विप लगाएको छ । राष्ट्रिय जनमोर्चाले पनि विश्वासको मत नदिने सङ्केत गरेको छ । स्वतन्त्र दुईजना सांसदहरु प्रभु साह र अमरेशकुमार सिंहले निर्णय गर्न बाँकी छ ।
