चालु अधिवेशनबाट टीआरसी विधेयक पारित गर्ने प्रधानमन्त्री ओलीको प्रतिबद्धता

काठमाडौँ । प्रधानमन्त्री केपी शर्मा ओलीले सदनको चालु अधिवेशनबाट संक्रमणकालीन न्यायसम्बन्धी विधेयक पारित गरिने बताएका छन् ।

मंगलबार टीआरसी कार्यदलको प्रतिवेदन बुझ्दै उनले संशोधनका लागि सदनमा रहेको टीआरसी विधेयकमा दलहरूबीच सहमति जुट्नु कोसेढुंगा भएको उल्लेख गरे । उनले कानुन बनाएरै शान्ति प्रकृयाको बाँकी अन्तिम काम टुंगोमा पुर्याउने बताए ।

‘अब यसलाई संसद्को समितिले सर्वसम्मतिले पारित गरेर पठाउँछ र पूर्ण हाउसले पनि सदनमा पास गर्छौं । यसै अधिवेशनबाट पास गर्छौं‚’ प्रधानमन्त्री ओलीले भने ।

प्रधानमन्त्री ओलीले धेरै छलफल र लामो समयपछि विधि पुर्याएर विधेयकमा सहमति जुटाएको भन्दै राजनीतिक दलहरुबीच अब कुनै पनि विवाद नरहने बताए ।