काठमाडौँ । निबन्धकार तथा नियात्राकार युवराज नयाँघरेको कृति ‘आगोको बीउ’ निबन्ध संग्रह लोकार्पण गरिएको छ । नयाँघरेको यो १९ औ कृति हो । वरिष्ठ कवि तथा समालोचक कृष्ण धरावासीले काठमाडौँमा उक्त कृतिको लोकार्पण गरेका हुन् ।
धरावासीले ‘आगोको बीउ’ निबन्धमा पाठकलाई लोभ्याउने जादु भएको उल्लेख गरे । निबन्धकार नयाँघरेको समसामयिक विषयलाई जस्ताको तस्तै चित्रण गर्ने क्षमता रहेको भन्दै आगोको बीउलाई आगोसंँग चित्रण गरे ।
कृतिकार नयाँघरेले आफु निवन्ध र नियात्रा लेखनको क्षेत्रबाट बाहिर जानै नसक्ने बताए । निबन्ध आफ्ना लागि यात्रा गर्दा टेक्ने दह्रो लठ्ठी भएको उहाँको भनाइ थियो । उहाँले आगोको बीउ निबन्ध दशैमा पाठककालागि खुराक हुने विश्वास पनि व्यक्त गरे ।
कृतिमाथि आख्यानकार तथा निवन्धकार अनिता कोइराला, भारती न्यौपाने, कुमारी लामा, ज्ञानु अधिकारीलगायतले टिप्पणी गरेका थिए । नयाँघरेको निबन्धसंग्रह ‘एक हातको ताली’ले मदन पुरस्कारसमेत पाइसकेको छ । पुस्तक रत्न पुस्तक भण्डारले प्रकाशनमा ल्याएको हो ।
