युनिसेफद्वारा बाढी पहिरो पीडितलाई सहयोग

काभ्रेपलाञ्चोक । संयुक्त राष्ट्रसङ्घीय बालकोष (युनिसेफ)ले नमोबुद्ध नगरपालिकाका ८ सय ४५ बाढी पहिरो पीडितलाई सहयोग गरेको छ ।

पीडित परिवारलाई हस्तान्तरण गर्नेगरी युनिसेफले नगरप्रमुख कुन्साङ लामालाई १ करोड ५० लाख ४० हजार ५ सय मङ्गलबार हस्तान्तरण गरेको हो । सोही दिन नेपालका लागि युनिसेफका प्रतिनिधि एलिस अकुङ्गाले नगरको वडा नम्बर ६ का पीडितलाई सहायता रकम प्रदान गरे । उक्त वडाका ५९ परिवारले सहायता रकम पाएका छन् ।

नगरमा ४ सय ५३ प्रतिपरिवारलाई १५ हजार तथा ३ सय ९२ परिवारलाई २० हजार सहायता रकम प्रदान गरिनेछ । अकुङ्गाले विपद बाट सबै भन्दा बढी महिला र बालबालिका प्रभावित भएकाले सहायता रकम प्रदान गरिएको बताए ।

सो संस्थाले निकट भविष्यमा मण्डनदेउपुर नगरका बाढी पहिरो पीडितलाई पनि आर्थिक सहयोग गर्ने जनाएको छ । युनिसेफले यसअघि बेथानचोक गाउँपालिकाका दुई वडाका २सय ६९ परिवारलाई आर्थिक सहयोग गरेको थियो ।
रासस