एजेन्सी । फिल्म ‘आदिपुरुष’को विवादले चर्किएको छ । फिल्ममा कृति सेननसँगै प्रभास र सैफ अली खान पनि मुख्य भूमिकामा छन् । सैफ अली खानको लुकलाई लिएर दर्शकहरु आक्रोशित छन् ।
फिल्म रिलिज हुनुअघि आदिपुरुष फिल्मबाट दर्शकहरुको धेरै आशा थियो तर फिल्म रिलिजपछि उनीहरुको अपेक्षा ठुलो धक्का लागेको छ ।
फिल्मले पहिलो दिन बक्स अफिसमा उत्कृष्ट कलेक्सन गरेको थियो । फिल्मको विरोध तिब्र रुपमा बढिरहेको छ । फिल्मको कथा, कलाकारको लुक र संवादलाई लिएर मानिसहरु निकै आक्रोशित देखिन्छन् ।
फिल्मलाई लिएर भारतका धेरै ठाउँमा विरोध प्रदर्शन पनि भइरहेको छ ।
फिल्म ‘आदिपुरुष’ मा जानकीको भूमिका निभाएकी कृति सेननले हालै आफ्नो इन्स्टाग्राम एउटा भिडियो शेयर गरेकी छिन् । भिडियो सेयर गर्दै कृति सेननले लेखेकी छिन्,‘ मेरो ध्यान तालीमा मात्र छ, जय श्री राम।’
यो भिडियो एउटा सिनेमा हलको हो जहाँ पूरै सिनेमा हल तालीले गुन्जिरहेको छ । थिएटरमा ठुलो भीड देखिएको र चलिरहेको विवादका बीच कृतिले यो भिडियो शेयर गर्दै ट्रोल गर्नेहरुलाई निशाना बनाएकी हुन् ।
तर, अर्कोतर्फ यस फिल्मले मानिसको भावनामा चोट पुर्याएको र राम, सीता र हनुमानको गलत छवि देखाएकोमा निर्माताहरुप्रति उनीहरु आक्रोशित छन् । यो फिल्मलाई प्रतिबन्ध लगाउन सरकारसँग माग समेत गरिएको छ ।
फिल्मको विवादमा हालसम्म कुनै पनि स्टार कास्टले प्रतिक्रिया दिएका थिएनन्, तर कृति सेननले आफ्नो इन्स्टाग्राममार्फत थिएटरका केही भिडियोहरू पोस्ट गरेकी छिन्।
हालसम्म प्रभास र सैफ अली खानले जारी विरोधमा कुनै प्रतिक्रिया दिएका छैनन् । कृति सेननको यो पोष्टलाई लिएर सामाजिक सञ्जालमा केही आक्रोशित भएका छन् र यस्ता भिडियो पोष्ट गरेर ‘रामायण’ को अपमान नगर्न आग्रह गरेका छन् । यो पोस्ट सेयर हुने बित्तिकै दर्शकहरुले कमेन्ट बक्समा चर्को कमेन्ट गरेका छन् ।
