समलिंगी विवाहले सामाजिक विकृति सिर्जना गर्छः कमल थापा

काठमाडौँ। राप्रपा नेपालका अध्यक्ष कमल थापाले समलिंगी विवाहले सामाजिक विकृति सिर्जना गर्ने बताएका छन्। सामाजिक सञ्जालमा एक पोस्ट गर्दै अध्यक्ष थापाले सो कुरा बताएका हुन्।

समलिंगी विवाह दर्ताको सम्बन्धमा सर्वोच्च अदालतले गरेको फैसला त्रुटिपूर्ण रहेको उनको भनाई छ। विवाह महिला र पुरुषबीचको पवित्र सम्बन्ध र समलिंगी विवाह सामाजिक मान्यता र संस्कार विपरीत रहेको उनको भनाइ छ।

अध्यक्ष थापाले ट्वीटरमा लेखेका छन्, ‘समलिंगी विवाह दर्ताको सम्बन्धमा सर्वोच्च अदालतको फैसला त्रुटिपूर्ण छ। समलिंगी विवाह प्राकृतिक नियम, सामाजिक मान्यता र संस्कार विपरीत छ। विवाह महिला र पुरुषबीचको पवित्र सम्बन्ध हो। समलिंगी विवाहले वैधानिकता पाउने हो भने यसले पारिवारिक झमेला एवं सामाजिक विकृति सिर्जना गर्दछ।’

बुधबार सर्वोच्च अदालतले यौनिक तथा लैंगिक अल्पसंख्यक नागरिकको विवाह दर्ता गर्न आदेश दिएको थियो।