ब्राइटनसँग म्यान्चेस्टर सिटीको बराबरी

एजेन्सी । इंग्लिस प्रिमियर लिग फुटबल अन्तर्गत म्यान्चेस्टर सिटी बराबरीमा रोकिएको छ ।

गएराति भएको खेलमा सिटीले ब्राइटनसँग १–१ गोलको बराबरी खेल्दै अंक बाँडेको हो । यद्यपि सिटीले जारी सिजनको उपाधि भने जितिसकेको छ ।

ब्राइटनको घरेलु मैदानमा भएको खेलको २५ औं मिनेटमा फिल फोडेनले गोल गर्दै सिटीलाई सुरुवाती अग्रता दिलाएका थिए । ३८ औं मिनेटमा जुलीओ इन्सीसोले गोल गर्दै ब्राइटनलाई १–१ को बराबरीमा ल्याए । त्यसपछि खेलमा थप गोल हुन सकेन ।

यो नतिजासँगै ब्राइटन लिगको छैटौं स्थानमा रहँदै लिगको अन्त्य गर्ने भएको छ  । एक खेल मात्र खेल्न बाँकी रहँदा ब्राइटनको ३७ खेलबाट ६२ अंक छ । सातौं स्थानमा रहेको एस्टन भिल्लाको समान खेलबाट ५८ अंक छ । सिटी भने ३७ खेलबाटै ८९ अंकका साथ शीर्षस्थानमा यथावत छ ।