काठमाडाैँ । सिटिजन्स बैंकले फोनपेसँगको सहकार्यमा नेपालकै पहिलो भर्चुअल क्रेडिट कार्ड सञ्चालनमा ल्याएको छ । ‘सिटिजन्स फोनपे क्रेडिट कार्ड’ नेपालको आफ्नै कार्ड स्किम भएको फोनपेले जनाएको छ ।
योसँगै नेपालमा पहिलोपटक क्यूआर भुक्तानी र क्रेडिट भर्चुअल बनेको कम्पनीको भनाइ छ ।
सिटिजन्स फोनपे क्रेडिट कार्ड सिटिजन्स स्मार्ट मोबाइल बैंकिङ एपबाट केही सेकेन्डमै प्राप्त गर्न सकिने भएको छ । यो क्रेडिट कार्डबाट १४ लाखभन्दा बढी फोनपे मर्चेन्टमा सजिलै स्क्यान गरी भुक्तानी गर्न सकिनेछ ।
यस्तै, मासिक खर्च ट्रयाक गर्न मिल्नेदेखि ४५ दिनसम्म ब्याजबिनाको क्रेडिट अवधि पाइने बैंकले जनाएको छ ।
५० प्रतिशत तत्काल क्यासब्याक अफर
सुरुआती चरणमा बिहीबारदेखि कार्ड प्रयोग गरेर कुनै पनि भुक्तानी गर्दा ५० प्रतिशत एक हजार रुपैयाँसम्म क्यासब्याक पाइने योजना फोनपे तथा बैंकले ल्याएको छ ।
सीमित समयको अफर सिटिजन्स फोनपे क्रेडिट कार्डका सबै प्रयोगकर्ताका लागि उपलब्ध हुने कम्पनीको भनाइ छ ।
सिटिजन्स बैंकका सीईओ गणेशराज पोखरेलले फोनपेसँगको सहकार्यमा नेपालकै पहिलो भर्चुअल क्रेडिट कार्ड सार्वजनिक गर्न पाएको भन्दै खुसी व्यक्त गरे ।
फोनपेका सीईओ दिवस कुमारले नेपालकै आफ्नै भर्चुअल क्रेडिट कार्डले डिजिटल भुक्तानीमा थप सजिलो अनुभव प्रदान गर्ने विश्वास व्यक्त गरे ।
