काठमाडौँ। राष्ट्रिय स्वतन्त्र पार्टी (रास्वपा)का उपसभापति डोरप्रसाद (डीपी) अर्याल ले सरकारले प्रस्तुत गरेको नीति तथा कार्यक्रम पुनर्लेखन नै गर्नुपर्ने अवस्थाको नभएको बताएका छन्।
प्रतिनिधिसभामा छलफलको क्रममा नीति तथा कार्यक्रम कामै नलाग्ने, खारेजै गर्नुपर्छ भन्नु उपयुक्त नहुने बताए। तर, उनले छलफलमा सहभागी सांसदहरूको उपस्थितिलाई हेरेर संसदमा बोल्नु रेकर्डको लागि मात्रै भएजस्तो भइरहेको टिप्पणी गरे।
उनले भने, ‘नीति तथा कार्यक्रममाथि आफ्नो धारणा राख्न उपस्थित भएको छु। तर, सदनको खाली कुर्सी हेर्दा आफू पनि रोष्ट्रममा आएर बोल्नु रोष्ट्रमकै अपमान गरेको जस्तो लाग्छ। घरमै बसेर ऐनमा हेरेर पेन्ड्राइभमा रेकर्ड गरेर सचिवालयमा बुझाइदिए हुने हो कि भन्नेजस्तो लाग्छ। २७५ जनाबीच हुने र सुन्ने र सुनाउने नीति तथा कार्यक्रमको छलफल रेकर्डको लागि मात्रै बोलिरहेको जस्तो लाग्छ।’
उनले छलफलमा सबै सांसदको उपस्थिति हुने वातावरण बनाउन सभामुखसमक्ष माग गरे।
