एजेन्सी । बलिउड अभिनेता शाहरुख खानको फिल्म ‘डन’ को तेस्रो भागको प्रतिक्षामा दर्शकहरु छन् । फरहान अख्तर लामो समयदेखि एक्शन थ्रिलर फिल्म ‘डन ३’ मा काम गरिरहेका छन् ।
अमिताभ बच्चनपछि शाहरुख खान बलिउडको अर्को डन बने तर अब खबर आइरहेको छ कि शाहरुख खानले ‘डन ३’ बाट आफूलाई टाढै राखेका छन् र यसपटक बलिउडमा नयाँ डन आउने भएको छ ।
पछिल्ला केही दिनदेखि बलिउडका बाजीराव अर्थात रणवीर सिंह नयाँ डन बनेर पर्दामा चर्चा कमाउने खबर आएको थियो तर अब फिल्मको बारेमा नयाँ अपडेट आएको छ ।
अमिताभ बच्चन र शाहरुख खानपछि अब दर्शकले फरहान अख्तरलाई ठूलो पर्दामा डनको भूमिका निभाएको देख्न पाउनेछन् ।
यद्यपी यसबारे अहिलेसम्म कुनै आधिकारिक घोषणा गरिएको छैन तर मिडिया रिपोर्टका अनुसार यस पटक फरहान अख्तर आफैं फिल्ममा मुख्य भूमिका निभाउन लागेका छन् ।
बलिउडको अर्को डन कुन कलाकारको रुपमा देखिने हो त्यो समय आएपछि मात्रै पुष्टि हुनेछ । ‘डन २’ को कुरा गर्ने हो भने यस फिल्ममा शाहरुख खानसँग प्रियंका चोपडा मुख्य भूमिकामा देखिएकी थिइन् । यी दुई स्टारसँग लारा दत्ता र बोमन इरानीले पनि स्क्रिन सेयर गरेका थिए ।
