एजेन्सी । छिमेकी राष्ट्र भारतको ओडिशास्थित बालासोरमा शुक्रबार साँझ भएको रेल दुर्घटनामा २०७ जनाको मृत्यु भएको छ भने ९०० भन्दा बढी यात्रु घाइते भएका छन् । मृतकको संख्या बढ्नसक्ने बताइएको छ ।
दुर्घटना बालासोरको बहंगा बजार स्टेशन नजिकै साँझ सवा ७ बजे भएको हो । कोलकाता–चेन्नई जाँदै गरेको कोरोमण्डल एक्सप्रेस र यशवंतपुर–हावडा एक्सप्रेस बहनगा नजिक पटरीबाट खसेका थिए । त्यसपछि कोरोमण्डल ट्रेलसँग मालगाडी ठोक्कियो ।
समाचार एजेन्सी पीटीआईका अनुसार, एक रेल अधिकारीले भने कि पहिले यशवंतपुर–हावडा एक्सप्रेस पटरीबाट खसेको थियो । यसका केही डिब्बा अर्को ट्र्याकमा पल्टिएर अर्कोतर्फबाट आउँदै गरेको शालिमार–चेन्नई कोरोमण्डल एक्सप्रेससँग ठोक्किएका थिए । यसपछि कोरोमण्डल ट्रेनका केही बग्गी पनि पटरीबाट खसेका थिए । यी बग्गीहरू अर्को ट्र्याकमा रहेको मालगाडीसँग ठोक्किएका थिए । केही बग्गी मालगाडीको माथि चढे ।
दुर्घटनाग्रस्त रुटका ६ वटा रेल रद्द गरिएका छन् । केही रेलको रुट परिवर्तन गरिएको छ । दुर्घटनाबारे प्रशासनले आपतकालीन नियन्त्रण कक्ष नम्बर ६७८२२६२२८६ जारी गरेको छ । यससँगै नजिकैका स्टेशनहरूको हेल्पलाइन नम्बरहरू पनि जारी गरिएको छ ।
प्रधानमन्त्री नरेन्द्र मोदीले दुर्घटनाप्रति दुःख व्यक्त गरेका छन् । उनले केन्द्रीय रेलमन्त्री अश्विनी वैष्णवसँग कुरा गरेर स्थितिको जानकारी लिए । उनले दुर्घटनामा ज्यान गुमाउनेका परिवारलाई २ लाख र घाइतेलाई ५० हजार दिने घोषणा गरेका छन् ।
केन्द्रीय रेलमन्त्री अश्विनी वैष्णवले मृतकका आफन्तलाई १० लाख, गम्भीर घाइतेलाई २ लाख र सामान्य घाइतेलाई ५० हजार रुपैयाँ दिने घोषणा गरेका छन् ।
