एजेन्सी । बंगलादेशमा आरक्षण विरोधी विद्यार्थी आन्दोलन चर्किएपछि अनिश्चितकालीन कर्फ्यु आदेश जारी गरिएको छ ।
देशभर इन्टरनेट र सामाजिक सञ्जालमा समेत रोक लगाइँदा सञ्चारसेवा समेत अवरुद्ध बनेको छ । आरक्षण विरोधी आन्दोलन गर्दै आएका विद्यार्थीहरूले प्रधानमन्त्री शेख हसिनाको राजीनामा माग्दै शुरु गरेको दोश्रो चरणको आन्दोलनको पहिलो दिन नै विद्यार्थीहरु माथि बर्बर दमन गरिएको हो ।
प्रहरीले आन्दोलनकारीलाई तितरवितर पार्न अश्रुग्यास प्रहार गरेको र सत्तारुढ दलका कार्यकर्ताले भीडमा ग्रिनेड हानेको जनाइएको छ । कर्फ्यु आदेश जारी गर्दै सरकारले देख्नेवित्तिकै गोली हान्ने आदेश पनि दिएको छ ।
आरक्षण कोटाको विरुद्धमा दोश्रो चरणका आन्दोलनमा होमिएका विद्यार्थीमाथि प्रहरी दमन हुँदा ९० बढीको मृत्यु भएको छ । पहिलो चरणको आन्दोलन नै हिंसात्मक बनेको यो आन्दोलनका क्रममा अहिलेसम्म मारिनेको संख्या दुई सय नाघेको छ ।
विद्यार्थी आन्दोलनकारीले सर्वसाधारणलाई कर नतिर्न र कुनै पनि सरकारी सुविधा उपभोग वापतको विल पनि भुक्तानी नगर्न आह्वान गरेका छन् ।
