एजेन्सी । जापानको तटीय सुरक्षा बलले ओकिनावा प्रान्तको ‘कोरल रीफ’को उत्तरतर्फको पानीमा बेपत्ता भएका सातै जना गोताखोरलाई सोमबार उद्धार गरिएको जनाएको छ ।
एघारौं क्षेत्रीय तटरक्षक मुख्यालयका अनुसार स्थानीय समयअनुसार अपराह्न तीन बजे हराइरहेका गोताखोरलाई वेपत्ता भएको दुई घण्टापछि उद्धार गरिएको हो । उनीहरूको खोजीका लागि हेलीकोप्टर तथा मोटरबाट चल्ने डुङ्गाको प्रयोग गरिएको थियो । उनीहरूलाई सकुशल उद्धार गरिएको छ ।
तटीय सुरक्षा अधिकारीका अनुसार बिहान ११ः५० बजे एक गोताखोर प्रशिक्षकले ओकिनावाको मुख्य टापुको दक्षिणमा इटोमन सिटीनजिकै ‘रुकान रीफ’बाट करिब ६०० मिटर उत्तरपूर्वको पानीमा डुबेर सात जना बेपत्ता भएको बताएका थिए ।
हराएका सात गोताखोरमध्ये पाँच जना गोताखोर यात्रामा सहभागी थिए भने अन्य दुई जना प्रशिक्षक थिए ।
ओकिनावा क्षेत्रीय प्रहरी मुख्यालयका अनुसार हेलिकप्टर र गस्ती डुङ्गाको खोजीपछि अपराह्न २ः०० बजेतिर हराएका गोताखोरहरूमध्ये छ जना चट्टानबाट लगभग पाँच किलोमिटर दक्षिणपूर्वमा समुद्रमा फेला परेका थिए ।
उक्त घटनाको हेलिकप्टरबाट अपराह्न २ः५५ बजे खिचिएको हवाई फुटेजमा एउटा गोताखोर चट्टानबाट करिब सात किलोमिटर दक्षिणपूर्वमा समुद्रमा तैरिरहेको उक्त समाचार जापानको सार्वजनिक प्रसारक एनएचके टेलिभिजनले अपराह्नको समाचारमा प्रसारण गरेको थियो ।
जापानी तटीय सुरक्षा बलको मुख्यालयका अनुसार बेपत्ता भएका सातै जना ‘ड्रिफ्ट डाइभिङ’ भनिने चट्टाननजिकै एक प्रकारको डाइभिङ गरिरहेका थिए, जुन डाइभिङको एक उन्नत रूप हो ।
