काठमाडौँ। छायाँदेवी चेतनाथ गजल पुरस्कार २०७८ र २०७९ को विजेता कृतिहरुको नाम सार्वजनिक भएको छ।
पुरस्कार २०७८ का लागि वसन्त ओली वसन्तीको गजल सङ्ग्रह ‘बोई’ र २०७९ का लागि प्रदीप रोदनको गजल सङ्ग्रह ‘मफलर’लाई प्रदान गर्न लागिएको छ। दश हजार रुपैयाँ नगदसहित सम्मानपत्र प्रदान गरिने यो पुरस्कार आउँदो कात्तिक २५ गते शनिवार काठमाडौँमा एक समारोहबीच प्रदान गरिनेछ।
साहित्यकार जेसागरले २०७४ सालमा आफ्नो गजल कृति ‘यत्ति भए पुग्छ’ विमोचन समारोहमा आफ्ना मातापिताको नाममा स्थापना गरेको पुरस्कार २०७४ सालदेखि नियमित प्रदान गरिँदै आएको थियो। विशेष कारणवश २०७८ सालमा प्रदान हुन नसकेको कारण यो वर्ष २०७८ र २०७९ को लागि एकैपटक प्रदान गर्न लागिएको हो।
बुलबुल पब्लिकेसन्सले संयोजन गर्दै आएको यो पुरस्कार २०७४ सालमा आवाज शर्माले सम्पादन गरेको संयुक्त गजल कृति ‘इन्द्रेणी–३, २०७५ सालमा टक गुरुङको गजल सङ्ग्रह ‘अनाहतु’ २०७६ सालमा प्रकृति प्रेमीको गजल सङ्ग्रह ‘समीर’ र २०७७ सालमा पुष्प अधिकारी अञ्जलीको गजल सङ्ग्रह ‘हरियो ऐना’लाई प्रदान गरिएको थियो।
बुलबुल पब्लिकेसन्सका निर्देशक तथा पुरस्कार संयोजक अच्युत घिमिरे बुलबुलले पुरस्कारको गरिमा र महत्त्वलाई सम्मान गर्दै सधैँ योग्य कृति पुरस्कृत होस् भन्नेमा आफू सचेत रहेको बताए।
रोजगारीको सिलसिलामा यूएईमा रहँदै आएका पुरस्कारका कोषका संरक्षक जे सागरले योग्य कृतिहरु पुरस्कृत भएको भन्दै खुशी व्यक्त गरे।
