प्रहरी अधिकारीहरुको सरुवा नियमित होः प्रधानमन्त्री

काठमाडौँ। प्रधानमन्त्री पुष्पकमल दाहाल प्रचण्डले प्रहरी अधिकारीहरुको सरुवा नियमित भएको बताएका छन्। मंगलबार सर्वदलीय बैठकबाट बाहिरिँदै गर्दा सञ्चारकर्मीलाई संक्षिप्त प्रतिक्रिया दिँदै प्रधानमन्त्री प्रचण्डले यसमा कुनै शंका मान्नुपर्ने आधार नै नभएको बताएका हुन्।

सोमबार गृहमन्त्रालयले नक्कली भुटानी शरणार्थी प्रकरणको छानविनमा संलग्न प्रहरी अधिकारीलाई सरुवा गरेको थियो।

उक्त प्रकरणको अनुसन्धानमा संलग्न काठमाडौँ प्रहरी परिसरका वरिष्ठ उपरीक्षक एसएसपी दानबहादुर कार्की र अपराध अनुसन्धान कार्यालयका एसएसपी मनोज केसीलाई सरुवा गरिएको थियो।

प्रहरी अधिकारीद्वयको सरुवालाई लिएर सर्वसाधरणले समेत सरकारमाथि प्रश्न उठाइरहेका बेला प्रधानमन्त्रीले प्रहरी अधिकारीको सरुवा नियमित प्रक्रिया भएको र शंका गर्नुपर्ने कुनै आधार नरहेको बताएका हुन्।