काठमाडौँ। राष्ट्रिय मानवअधिकार आयोगले पछिल्लो समयमा चिकित्सकमाथि भइरहेका आक्रमण र स्वास्थ्य संस्थाहरूमा तोडफोड भएको घटनाप्रति ध्यानाकर्षण भएको जनाएको छ। आयोगका प्रवक्ता टीकाराम पोखरेलले बिहीबार एक विज्ञप्ति जारी गर्दै आक्रमण र स्वास्थ्य संस्थाहरूमा तोडफोड भएको घटनाप्रति ध्यानाकर्षण भएको जनाएको हो।
आयोगले चिकित्सक माथिका आक्रमण तथा कुटिपटका घटना बन्द गर्न र अत्यावश्यकीय स्वास्थ्य सेवा बन्द नहुने वातावरण बनाउन आग्रह गरेको छ। आयोगले बिहीबार एक विज्ञप्ति जारी गर्दै कास्की, मकवानपुर, लमजुङ, चितवन जिल्लालगायतका विभिन्न अस्पतालमा कार्यरत चिकित्सकमाथि भएका आक्रमण, दुव्र्यवहार तथा स्वास्थ्य संस्थाहरूमा भएको तोडफोड एवम् चिकित्सकले आकस्मिकबाहेकका स्वास्थ्य सेवा बन्द गरी आन्दोलनमा उत्रिँदा नागरिकको स्वास्थ्य उपचारमा पर्न गएको असरप्रति राष्ट्रिय मानव अधिकार आयोगको गम्भीर ध्यानाकर्षण भएको जनाएका छन्।
चिकित्सकहरूको सुरक्षा व्यवस्था,स्वास्थ्य सेवाको निरन्तरता तथा बिरामीले भोग्नु परिरहेका समस्या सम्बन्धमा आयोगले विभिन्न माध्यमबाट निरन्तर अनुगमन गरिरहेको आयोगले जनाएको छ। उपचारमा खटिनुपर्ने स्वास्थ्यकर्मीहरू आन्दोलित हुँदा बिरामी मर्कामा परेको आयोगको भनाइ छ।
‘शान्ति सुरक्षा र घटनामा संलग्न’माथि कानुनी कारबाहीको माग गर्दै चिकित्सकले असोज ९ र १० गते अस्पतालको आकस्मिक बाहेकका सम्पूर्ण सेवा बन्द गरी आन्दोलनमा उत्रिएका कारण उपचारका लागि आएका बिरामीहरु सेवा पाउनबाट बञ्चित भएको देखिएको छ। चिकित्सकमाथि आक्रमणका श्रृङ्खलाबद्ध घटनाहरु विगतमा समेत हुँदै आएका थिए,’ जारी गरेको विज्ञप्तिमा उल्लेख छ, ‘यसबाट स्वास्थ्यकर्मीको मनोबल र स्वास्थ्य संस्थाहरूको प्रभावकारितामा असर परेको देखिन्छ । स्वास्थ्यकर्मी स्वास्थ्य सेवा नै बन्द गरी आन्दोलनमा उत्रिँदा नागरिकको स्वास्थ्योपचारको हकमा असर पर्नुका साथै, स्वास्थ्य संस्थाहरु धराशायी बन्न पुग्ने संभावना रहन्छ।’
गत भदौ २४ गते हेटौँडाको सञ्चो अस्पतालका चिकित्सकमाथि सेवाग्राहीबाट हातपात भएको,असोज ७ गते लमजुङको लमजुङ अस्पतालका चिकित्सकमाथि स्थानीय जनप्रतिनिधिबाट हातपात भएको, असोज ८ गते पोखराको मणिपाल अस्पतालमा चिकित्सकमाथि सेवाग्राहीले कुटपिट, दुव्र्यवहार र आक्रमण गरेको घटना सम्बन्धमा अनुगमन गरेको आयोगले जनाएको छ।
