इजरायल आक्रमणमा परी मृत्यु भएका तीनको शव नेपाल आइपुग्यो, बाँकी १ जनाको शव केहीबेरमा आउने

काठमाडौँ । इजरायलमा आक्रमणमा परी मृत्यु भएका तीन जना नेपालीको शव काठमाडौं आइपुगेको छ । बाँकी १ जनाको शव केहीबेरमा आउने बताइएको छ । मृतक १० मध्ये तीन जनाको शव आज काठमाडौं ल्याइएको हो ।

इजरायल सरकारले पहिचान खुलेका चार जनाको शव कानूनी प्रक्रिया पूरा गरी नेपाली दूतावासमा बुझाएसँगै आइतवार बिहान शव काठमाडौं आइपुगेको हो ।

नारायणप्रसाद न्यौपाने, लोकेन्द्रसिंह धामी र दीपेशराज बिष्टको शव नेपाल आइपुगेको छ । आशिष चौधरीको शव आजै काठमाडौँ आइपुग्ने बताइएको छ । न्यौपानेको शव राति नै नेपाल आइपुगेको थियो । आइतवार बिहान धामी र बिष्टको शव विमानस्थल आइपुगेको हो ।

चौधरीको शव नेपाल आइपुगेसँगै चार वटै शवलाई नेपाली सेनाको हेलिकप्टरमार्फत धनगढी लगिने बताइएको छ । धनगढीमा स्थानीय प्रशासनले पीडितको घरसम्म शव पुगाउने व्यवस्था गर्नेछ ।