सुनसरीको सीमाक्षेत्रबाट भारततर्फ लाँदै गरेको ७१ किलो गाँजा बरामद

काठमाडौँ । भारततर्फ लैजाँदै गरेको ७१ किलो गाँजा सशस्त्र प्रहरीको टोलीले सुनसरीको दशगजानजिकैको क्षेत्रबाट बरामद गरेको छ ।

मंगलबार राति सवा नौ बजेको समयमा सुनसरीको देवानगञ्ज गाउँपालिका– ४ स्थित यादव टोलको मकैबारीबाट उक्त परिमाणको गाँजा प्रहरीले बरामद गरेको हो ।

मकैबारीबाट २ जना व्यक्तिहरूले लुकिछिपी २ वटा बोरामा भारततर्फ लैजाँदै गरेको उक्त गाँजा सशस्त्र प्रहरी बल प्रस्तावित सीमा सुरक्षा गुल्म कप्तागन्जको टोलीले बरामद गरेको हो ।

उक्त गाँजा बोकेका दुवैजना व्यक्तिहरू खुला सिमानाको फाइद उठाउँदै भारततिर भागेका छन् । बरामद गाँजा अनुसन्धान र कारबाहीका लागि इलाका प्रहरी कार्यालय देवानगञ्जमा बुझाइएको सशस्त्र प्रहरी बलका सह–प्रवक्ता शैलेन्द्र थापाले बताए ।