टिकटक पुरै बन्द गर्न सकेनौँः सञ्चारमन्त्री शर्मा

काठमाडौँ । सञ्चार तथा सूचना प्रविधिमन्त्री रेखा शर्माले पूर्ण रुपमा टिकटक बन्द गर्न नसकेको बताएकी छन् ।

बिहीबार काठमाडौँमा आयोजित ‘अनलाइनमा महिला सुरक्षा’ अन्तरक्रिया कार्यक्रममा बोल्दै उनले देशमा ‘ब्यान्डविथ’को प्लेटफर्म नहुँदा टिकटक बन्द गर्न सरकार असफल भएको बताएकी हुन् ।

‘टिकटक बन्द गर्ने भनेर सरकारले निर्णय त गर्यो तर हामीले पुरै बन्द गर्न सकेनौँ नि त । किनकि हामीसँग त्यो खालको प्रविधि रहेनछ,’ मन्त्री शर्माले भनिन् ।

उनले इन्टरनेटको दुरुपयोगबाट महिलाले असुरक्षा र हिंसा भोग्नुपरेको धारणा राखिन् । संसारभरि चल्ने सबै डिजिटल प्लेटफर्म नेपालमा प्रयोग हुन्छन् तर त्यसको नियमन गर्न नसकिने हुँदा असुरक्षा पैदा भएको उनको भनाइ छ ।