काठमाडौँ । उपप्रधान तथा परराष्ट्रमन्त्री नारायणकाजी श्रेष्ठले रुसी सेनामा भर्ना भएका नेपालीहरु फिर्ता ल्याउन सरकारले पहल गरिरहेको बताएका छन् ।
प्रतिनिधि सभाको बैठकमा उठेका प्रश्नको जवाफ दिँदै रुसी सेनामा भर्ना भएका नेपालीहरूलाई फिर्ता ल्याउन सरकारले पहल गरिरहेको मन्त्री श्रेष्ठको भनाई छ ।
‘रुसी विदेश मन्त्रालयले सेनामा भर्ती भएकाहरू मध्ये घर फर्किन चाहनेहरूलाई करार रद्द गर्न सहयोग गर्नेबारे आफ्नो सैद्धान्तिक सहमति रहेको जानकारी गराएको छ । तर, त्यसको मोडालिटी तय हुन बाँकी रहेको छ,’ मन्त्री श्रेष्ठले भने, ‘यसबारे मस्को स्थित नेपाली राजदूतावासले निरन्तर फलोअप गरिरहेका छ । युक्रेनमा बन्दी बनाइएकाहरूको फोटो सार्वजनिक भएको छ । उहाँहरूलाई नेपाल फर्काउने प्रयास भइरहेको छ ।’
रुसी सेनामा सहभागी भएर मृत्यु भएका परिवारलाई क्षतिपूर्ति र बीमावापतको रकम उपलब्ध गराउने प्रक्रिया सुरु भइसकेको श्रेष्ठले जानकारी दिए ।
रुसी सेनामा रहेका नेपालीहरूको सन्दर्भमा र युक्रेनमा रुसी सेनामा भर्ती भएकै कारणले बन्दी बनाइएका नेपालीहरुबारे सरकारले सम्पूर्ण रूपले समस्या समाधान गर्ने संकल्पको साथ अघि बढिरहेको बताए ।
