काठमाडौँ । संघीय संसद प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समिति सभापति अम्मरबहादुर थापाले पद तथा गोपनियताको शपथग्रहण गरेका छन् ।
बुधबार समितिको सभापतिमा निर्बिरोध निर्वाचित भएसँगै सभापति थापाले पद तथा गोपनियताको शपथग्रहण गरेका हुन् ।
बुधबार अपरान्ह संसद भवनस्थित ल्होत्से हलमा सभामुख देवराज घिमिरेले सभापति थापालाई पद तथा गोपनियताको शपथग्रहण गराए । शपथग्रहणपछि सञ्चारकर्मीहरुसँग कुरा गर्दै उनले समितिमा आउने महत्वपूर्ण कामलाई प्राथमिकताका साथ अघि बढाउने बताए ।
उनले देश निर्माणमा शिक्षा महत्वपूर्ण हुने भन्दै शिक्षालाई सुधार गर्दै अघि बढ्ने बताए । उनले अब शिक्षा क्षेत्रलाई अघि बढाउने उद्देश्य र योजनाअनुरुप अघि बढ्ने बताए । उनले शिक्षा र स्वास्थ्यका लागि नागरिकलाई सहज हुनेगरी काम गर्ने प्रतिवद्धता जनाए । शिक्षा र स्वास्थ्य क्षेत्रको सुधार गरेरै छोड्ने बताए ।
सभापति थापाले ले शिक्षकलाई कर्मचारी सरहको सेवा सुविधा दिनेगरी काम गर्ने बताए । उनले राजनीतिबाट शिक्षालाई टाढा राख्ने उद्देश्य राखेको बताए ।
