सिन्धुली । सिन्धुलीमा संचालित राष्ट्रिय गौरवको आयोजना सुनकोशी–मरिण डाइभर्सन बहुदेश्यीय आयोजनाको सुरुङ निर्माणको कार्य आगामी एक महिनाभित्र सम्पन्न हुने भएको छ ।
सो आयोजनाअन्तर्गत कुल १३ दशमलव ३ किलोमिटर सुरुङमध्ये १२ दशमलव ५ किलो मिटर सुरुङ निर्माण सम्पन्न भइसकेको छ भने बाँकी ८ सय मिटर सुरुङ निर्माण गर्न बढीमा एक महिनाको अवधि लाग्ने बताइएको छ ।
एक महिनाभित्रमा सुरङ निर्माणको कार्यले ब्रेक थ्रु हुने संकेत देखिएसँगै टनेल वोरिङग मेसिन (टिविएम)को एक्जिट गराउन र सुनकोशी नदीमा बाँधको निर्माण कार्यलाई तिब्रता दिइएको छ ।
आयोजनाका निर्देशक मित्र बरालका अनुसार विगत दुई महिनासम्म भुगर्भभित्रको सुख्खा र लेदो पहिरो खसेर लगातार जाममा परेको सुनकोशी–मरिण डाइभर्सनको टिविएमले पछिल्लो समयमा दैनिक रुपमा ५० मिटरको हाराहारीमा सुरुङ निर्माणको कार्य गरिरहेकाले एक महिनाभित्रमा ८ सय मिटर सुरुङ निर्माण सकेर ब्रेक थ्रो हुने बताए ।
नेपाल सरकारको उर्जा जलश्रोत तथा सिंचाई मन्त्री शक्तिबहादुर बस्नेत सो मन्त्रालयका सचिव शुशिलचन्द्र तिवारी, उर्जा जलश्रोत तथा सिँचाइ विभागका निर्देशक चुडाबहादुर ओली लगायतको उच्च स्तरीय टोलीले आयोजनाको अनुगमन, निरीक्षण गरेको छ ।
आयोजनाको सुरुङ् निर्माण गर्ने चिनियाँ ठेकेदार कम्पनी चाईना ओभरसिज इन्जिनियरिङ कम्पनी कोवेकले लक्ष्यभन्दा बढी निर्माणको कार्य गरिरहेको छ भने बाँध निर्माणको कार्यसमेत पटेल रमण जेभीले अघि बढाएको छ ।
सुरुङ निर्माण सम्पन्न हँदै जाँदा आयोजनाको सुनकोशी नदीमा बाँध निर्माणको कार्य पटेल रमण जेभी ठेकेदार कम्पनीबाट अघि बढाइएको छ भने र ३१ मेगावाट विद्युत उत्पादनका निम्ति आवश्यक पुर्वाधार निर्माणका कार्यहरु भइरहेका छन् ।
