काठमाडौँ । दैलेखमा बँदेलको आक्रमणबाट ७ जना घाइते भएका छन् । दैलेखको भैरवी गाउँपालिका– ६ मा बँदेलको आक्रमणमा परी ७ जना घाइते भएका हुन् ।
जंगलबाट मात्तिएर गाउँ पसेको बँदेलले आक्रमण गरेको हो। घाइते हुनेहरूमा गणेश सिजाली, लछुमन पुन मगर, रत्न बहादुर बराल, तर्कबहादुर पुन मगर, पुर्ण सिजाली, जयबहादुर थापा मगर र तिलक पौडेल रहेका छन् ।
बँदेल आक्रमणमा परेका ३ जना उपचारका लागि खम्बागाडे बजारको लाइफ केअर फार्मेसीमा भइरहेको वडाअध्यक्ष तुलबहादुर हमालले बताए । गणेश सिजालीलाई थप उपचारका लागि जिल्ला अस्पताल, दैलेखमा पठाइएको फार्मेसी सञ्चालक अर्जुन सुनारले जानकारी दिए ।
गत फागुनमा भैरवी ६ कै ६३ वर्षकी पवित्रा कँडेललाई बँदेलले घरमै आक्रमण गरेको थियो। बँदेलले उनको खुट्टाको साप्रो र हातको औंला चपाएको थियो ।
