काठमाडौँ । प्रधानमन्त्री केपी शर्मा ओलीले भारतीय प्रधानमन्त्री नरेन्द्र मोदीलाई नेपाल भ्रमणको निमन्त्रणा दिएका छन् ।
परराष्ट्र सचिव सेवा लम्सालको निमन्त्रणामा २ दिने नेपाल भ्रमणमा आएका भारतीय विदेश सचिव विक्रम मिस्रीमार्फत् प्रधानमन्त्री ओलीले समकक्षी मोदीलाई नेपाल भ्रमणको निमन्त्रणा दिएका हुन् ।
चौथो कार्यकालका लागि प्रधानमन्त्री बनेका ओलीलाई हालसम्म मोदीले निम्तो पठाएका छैनन् ।
भारतीय विदेश सचिव मिस्रीले राष्ट्रपति रामचन्द्र पौडेल, प्रधानमन्त्री केपी शर्मा ओली, कांग्रेस सभापति शेरबहादुर देउवा, माओवादी अध्यक्ष पुुष्पकमल दाहालसहित शीर्ष नेताहरूसँग शिष्टाचार भेट गरिसकेका छन् ।
शीतल निवासमा भएको राष्ट्रपतिसँगको शिष्टाचार भेटमा द्विपक्षीय हित र सम्बन्धका विषयमा कुरा भएको थियो ।
राष्ट्रपति पौडेलले जलवायु परिवर्तनका असर न्यूनीकरणका लागि नेपाल र भारत मिलेर काम गर्नुपर्ने बताए ।
